【為什麼我要一個人去旅行】感想和一些趕不及寫的東西
終於完成一個人嘅旅行！感想係：
- 唔買嘢難過減肥
- 去旅行唔記得自己好窮
- 我真係好大食
- 我無蕩失過路！（讚我！）
- 平時太幸福，唔覺得一個人去比起同肥仔去自由好多
- 無咗平時最後果晚死唔蝕底要食多好多嘢或者買多好多嘢嘅衝動，因為我知我一定會再去
- 第一次回程上機唔覺得「返地獄」，有得返屋企仲好興奮！因為唔使返工！！！
- 我仲係唔係好肯定點解我要一個人去旅行，不過起碼完成咗，開心😁
💖必翻兜精選：
- 阿英滷肉飯（滷肉飯）
- 阿財虱目魚（滷肉飯）
- 通化夜市-紅花麻辣鹽水雞（豆皮、百頁豆腐）
- 通化夜市-一口金酥臭豆腐（酸菜！）
利申：今次無食瞞著爹
「桂師父滷味」
呢檔滷味喺酒店樓下，前兩晚都見有人排隊買，最後果晚就買咗做宵夜。
檔口感覺好乾淨企理，尤其啲蔬菜望落好新鮮。
佢個滷汁比較清淡，有啲咁多中藥味，唔鹹，啱啲唔想食咁重口味嘅朋友。
我夾咗咁多樣嘢最好味同最入味係豬腳筋同豆皮，
值得一提佢個豬血糕都唔錯，Q彈、唔臭、軟硬適中，但就唔算入味。
另外佢啲菜一份都係NT$20-30，份量都唔少！如果食咗成日肉就咁單買份菜嚟平衡返都唔錯。
不過相比之下滷味我就鍾意通化夜市果檔紅花多啲，重口味好多。
「祥豪牧場 羊舍鮮羊乳」
話說出發前有個朋友同我講台灣嘅羊奶都好好飲，
所以今次去都有專登留意下，不過真係唔係間間超級市場都會有。
最後我臨走前終於喺sogo買到一支，
睇佢個包裝好溫純，但一飲就好似成個家族嘅羊一齊衝入個口度咁🐏🐏🐏
仲要係全家都未沖涼果隻，真係估佢唔到！
我飲咗兩啖就投咗降…
「回程兒童飛機餐」
回程嘅兒童餐都係類似漢堡扒嘅物體，上面無人樣但變咗兩塊蛋皮做嘅星星。
隔嚟有南瓜、黃晒嘅西蘭花同白汁意粉，沙律上面仲有隻好邪惡嘅兔仔🐰
好食就無份㗎喇不過志在無食正常餐咁悶。
「受夠了！我要炒老細」
飛台北實在太短，扣埋果啲廣播時間，連一齣戲都睇唔晒。
我飛兩程先睇晒晒成齣「受夠了！我要炒老細」。
我仲以為我咁嘅身世睇會好感動，可惜都係一貫日本片講故事方式，
即係講好撚多阿媽係女人嘅對白等好耐之後先畀啲高潮位你睇。
可能平時做嘢好辛苦嘅朋友去睇會感同身受…
「法國的秘密甜點 布丁燒諾曼地」
因為臨走食果件蛋糕幾好味，所以就買咗條可以帶走嘅蛋糕返屋企。
外表似一條蜂蜜蛋糕，其實係奶味好重又鬆軟嘅蛋糕夾住布甸夾層同一層濃厚嘅忌廉。
其實條蛋糕係要雪嘅，我買完用埋冰包圍住佢，
過海關前要拎走晒啲冰包，再常溫咁拎返屋企。
飛機仲要delay咗成粒鐘，返到嚟等巴士又耐過人，所以我真係有啲對條蛋糕唔住。
可能因為太長時間無雪，夾層都無咁分明，同埋蛋糕本身濕咗。
口感有影響但味道真係唔差，好過好多好出名嘅手信蛋糕。
不過下次都係喺當地買完喺果邊食埋算喇，咁樣夾硬拎好似太大嘥喇。
Search